Canon í Friðlandinu í Flóa

Canon, Fuglavernd og Origo standa fyrir skemmtilegum viðburði í Friðlandinu í Flóa laugardaginn 4. maí nk. þar sem Canon notendum gefst kostur á að prófa mikið úrval af Canon ljósmyndabúnaði, m.a. langar aðdrátttarlinsur, við náttúrulegar aðstæður.

Þeir Jóhann Óli Hilmarsson og Alex Máni, sem báðir gjörþekkja Friðlandið í Flóa, verða þátttakendum innan handar og leiðbeina um helstu staði og umgengni um svæðið og starfsmenn frá Origo aðstoða með Canon búnað.

Viðburðurinn er aðeins fyrir Canon notendur og er mikilvægt að fólk komi með sinn eigin búnað.

Ókeypis er á viðburðinn en nauðsynlegt er að skrá sig. Aðeins 30 sæti í boði.

Skráning á: Canon í Friðlandinu í Flóa

Athugið að ef apríl verður blautur þá er gott að mæta með stígvél.

Fuglalífið

Á þessum árstíma er fuglalífið í Friðlandinu í sínu fínasta pússi. Lómarnir fljúga um gólandi eða slást um varpstaði á tjörnunum, jaðarkanar, lóuþrælar, hrossagaukar og þúfutittlingar iðka söngflug sitt af krafti og ef við erum heppin, sýna fyrstu óðinshanar vorsins sig. Ýmsar endur, álftir, gæsir og fleiri vaðfuglar eru að búa í haginn fyrir varp eða fuglarnir eru þegar orpnir.

Álftir og lómar í Friðlandinu í Flóa.
Álftir og lómar í Friðlandinu í Flóa. Ljósmynd: Jóhann Óli Hilmarsson

Aðkoma

Aðkoma í Friðlandið er frá Eyrarbakkavegi, ca. fyrir miðju Eyrarbakkaþorpi. Til að finna skoðunarhúsið er ekið til norðurs að bænum Sólvangi og framhjá honum og síðan sem leið liggur norður Engjaveg framhjá Flóagaflshverfinu og stuttu síðar beygt til vinstri, þar sem skilti vísar á Stakkholt og bílastæði. Skoðunarhúsið er eina byggingin í mýrinni og blasir við víða að.

Afstöðukort af Friðlandinu í Flóa.
Afstöðukort af Friðlandinu í Flóa.

 

Kort af Friðlandinu í Flóa
Kort af Friðlandinu í Flóa
Fuglaskoðunarhús, Friðlandið í Flóa í febrúar © Ljósmynd: Dögg Matthíasdóttir

 

 

Fuglaljósmyndun í máli og myndum

Sandlóur ©Bjarni Sæmundsson – 

Fuglavernd, Canon og Origo efna til viðburðar þann 9. apríl 2019 þar sem öflugir fuglaljósmyndarar munu sýna ljósmyndir og fræða fólk um fuglaljósmyndun.

Á viðburðinum munu eftirfarandi ljósmyndarar vera með myndasýningar og segja sögurnar á bak við myndirnar: Bjarni Sæmundsson, Björgvin Sigurbergsson og Yann Kolbeinsson.

Ólafur Karl Nielsen, formaður Fuglaverndar, opnar viðburðinn og mun hann fjalla um grunnstoðir fuglaverndar, þ.e. tegundavernd, búsvæðavernd, sjálfbæra nýtingu og endurheimt vistgæða og þá hvernig ljósmyndarar með verkum sínum geta miðlað þessu til almennings.

Origo mun sýna úrval af Canon myndavélum og linsum, m.a. langar aðdráttarlinsur. Við verðum t.d. með hina nýju EF 400/2.8L IS III USM sem er léttasta 400mm f/2.8 linsa í heimi.

Viðburðurinn fer fram í Origo, Borgartúni 37 105 Reykjavík og húsið opnar kl. 19:00 þar sem áhugasamir geta skoðað Canon ljósmyndabúnað en myndasýningar hefjast kl. 19.30.

Ókeypis er á viðburðinn en nauðsynlegt er að skrá sig.

Skráning á Canon kvöld

Streak-chested antpitta ©Yann Kolbeinsson
© Björgvin Sigurbergsson

Bí, bí, bí og dirrindí

Ljósmynd © Daníel Bergmann

Fuglavernd, Canon og Origo efna til viðburðar þar sem öflugir fuglaljósmyndarar munu sýna ljósmyndir og fræða fólk um fuglaljósmyndun. Þau Daníel Bergmann, Guðbjartur Ísak Ásgeirsson og Jónína G. Óskarsdóttir verða með myndasýningar og segja sögurnar á bak við myndirnar.

Sindri Skúlason, varaformaður Fuglaverndar og fuglaljósmyndari, opnar viðburðinn, kynnir félagið í stuttu máli og tæpir á siðfræði fuglaljósmyndunar. Sýndar verða ljósmyndir af íslenskum og erlendum fuglategundum og mun Daníel Bergmann t.d. sýna myndir frá Svalbarða og Suðurhöfum (Antarktíku, Suður-Georgíu og Falklandseyjum) og nefnist fyrirlestur hans Norður og niður.

Origo mun sýna úrval af Canon myndavélum og linsum en því miður verða ekki langar aðdráttarlinsur á staðnum þar sem Canon er búið að senda mikið magn til Rússlands vegna HM í knattspyrnu.

Viðburðurinn fer fram í Origo, Borgartúni 37. Húsið opnar kl. 19:00 þar sem áhugasamir geta skoðað Canon ljósmyndabúnað en myndasýningar hefjast kl. 19.30.

Ókeypis er á viðburðinn en nauðsynlegt er að skrá sig.

© Guðbjartur Ísak Ásgeirsson

 

© Jónína G. Óskarsdóttir

Ljósmyndasamkeppni CAFF

CAFF, stendur fyrir ljósmyndasamkeppni á starfsvæði sínu á norðurheimskautinu.

Keppninni er skipt í fjóra flokka:

Verðlaun verða veitt í hverjum flokki, en aðalverðlaunin eru ljósmyndaferð til Rovaniemi í Finnlandi í fjórar nætur. Allar nánari upplýsingar eru á https://photocontest.arcticbiodiversity.is/. Skilafrestur er til 1. ágúst 2018.

Ljósmyndanámskeið – stafræn fuglaljósmyndun

Fuglavernd stendur fyrir námskeiði í stafrænni fuglaljósmyndun dagana 19. – 21. maí 2017.

Markmiðið er að kynna grunnatriði í fuglaljósmyndun; tæki, tækni og nálgun við fugla. Farið verður yfir hvaða myndavélar henta best, hvernig linsur, þrífætur, forrit og fleiri tæknileg atriði. Rætt verður um myndbyggingu, felutjöld, ljósmyndun úr bíl og annan útbúnað.

Námskeiðið getur nýst jafnt byrjendum sem lengra komnum.

Verð fyrir félagsmenn Fuglaverndar eru 35.000 kr. en annars 39.000 krónur. Bent er á að mörg stéttarfélög taka þátt í námskeiði af þessu tagi, allt að 50% af námskeiðsgjaldi.

Námskeiðslýsing

Föstudagur frá 18:30-22:00 – innifalið er léttur kvöldverður
Í fyrsta hluta er farið yfir grunnatriðin. Farið verður yfir hvað skiptir máli við val á myndavélum, linsum og aukabúnaði.  Stillingar og tæknileg atriði verða rædd.  Farið verður í hluti eins og myndbyggingu og hvað þarf að hafa í huga þegar verið er að mynda. Bent verður á góða staði til fuglaljósmyndunar, skoðað hvernig best er að nálgast fugla og farið verður í ýmis hagnýt atriði er snúa að fuglaljósmyndun.

Laugardagur frá 13:00-17:00 – sameinast í bíla
Í öðrum hluta er farið í vettvangsferð þar sem þátttakendur spreyta sig í fuglaljósmyndun. Farið verður á nokkra góða fuglaljósmyndastaði sem eru eftirsóttir á höfðuborgarsvæðinu. Sýnt hvernig þekking á íslensku fánunni nýtist í að nálgast viðfangsefnið.

Sunnudagur frá 13:00-17:00
Þriðji hluti er svo helgaður úrvinnslunni og frekari leiðum til að öðlast færni í bæði fuglaljósmyndun og eftirvinnslu. Farið yfir helstu atriði við lagfæringu mynda og hvaða forrit er best að nota.

Skráning

Skráning á ljósmyndanámskeið 19. – 21. maí 

 

Viðburðurinn á Facebook: Ljósmyndanámskeið – stafræn fuglaljósmyndun

Fuglar og ljósmyndun á Norðurlandi

Ekki missa af fræðslu og fuglafjöri með Fuglavernd, Canon, Nýherja og Pedromyndum.

Þriðjudaginn 16. maí nk. verður mikið fugla- og ljósmyndafjör í safnaðarheimili Akureyrarkirkju þegar áhugaljósmyndarar á sviði fugla og fuglaáhugamenn munu sýna ljósmyndir og veita fræðslu um fuglaljósmyndun.

Á viðburðinum munu þeir Eyþór Ingi Jónsson, Yann Kolbeinsson og Gaukur Hjartarson vera með myndasýningar og segja sögurnar á bak við þeirra myndir í safnaðarheimili Akureyrarkirkju. Þá mun Sverrir Thorstensen, fuglaáhugamaður, veita fræðslu um fuglalíf í Eyjafirði.

Ofur aðdráttarlinsur til sýnis

Við höfum fengið lánaðar aðdráttarlinsur hjá Canon Europe sem verða til sýnis, m.a. EF 200-400mm f/4L IS USM Extender 1.4X, EF 400mm f/2.8L IS II USM og EF 500mm f/4L IS II USM o.fl. Þá verða nýjustu Canon EOS myndavélarnar á staðnum, m.a. EOS 7D Mark II, EOS 5D Mark IV og EOS-1D X Mark II!

Fuglafjörið er opið fyrir alla áhugasama um fugla og fuglaljósmyndun.

Húsið opnar kl. 19:00. Ókeypis inn, en nauðsynlegt að skrá sig.

Auðnutittlingur: Ljósm. Eyþór Ingi Jónsson.

Skrá á viðburð: http://bit.ly/2pdC8cX

Æðarfugl

Námskeið í fuglaljósmyndun

Fuglavernd stendur fyrir námskeiði í stafrænni fuglaljósmyndun dagana 19. – 21. maí 2017.

Markmiðið er að kynna grunnatriði í fuglaljósmyndun; tæki, tækni og nálgun við fugla. Farið verður yfir hvaða myndavélar henta best, hvernig linsur, þrífætur, forrit og fleiri tæknileg atriði. Rætt verður um myndbyggingu, felutjöld, ljósmyndun úr bíl og annan útbúnað.
Námskeiðið getur nýst jafnt byrjendum sem lengra komnum.
Skráning og frekari upplýsingar má finna hér. 

Æðarfugl prýðir þessa frétt en ljósmyndina tók Sindri Skúlason.

Canon kynning og myndakvöld

Fuglavernd, Canon og Nýheri efna til viðburðar fimmtudagskvöldið 30. mars kl. 19:30 þar sem öflugir fuglaljósmyndarar munu sýna ljósmyndir auk þess sem veitt verður fræðsla um fuglaljósmyndun.

Á viðburðinum munu Eyþór Ingi Jónsson, Gunnlaugur Sigurjónsson og Ingi Steinar Gunnlaugsson vera með myndasýningar og segja sögurnar á bak við þeirra myndir.

Þá mun Jóhann Óli Hilmarsson, formaður Fuglaverndar og fuglaljósmyndari kynna félagið í stuttu máli og tæpa á siðfræði fuglaljósmyndunar.

Úrval af Canon ljósmyndabúnaði til sýnis.

Frá Canon Europe hefur Nýherji fengið lánaðar aðdráttarlinsur sem verða til sýnis, m.a. EF 200-400 mm f/4L IS USM Extender 1.4X, EF 400mm f/2.8L IS II USM og EF 500 mm f/4L IS II USM.

Þá verða nýjustu Canon EOS myndavélarnar á staðnum, m.a. EOS 7D Mark II, EOS 5D Mark IV og EOS-1D X Mark II.

Viðburðurinn fer fram hjá Nýherja, Borgartúni 37 og hefst kl. 19:30. Húsið opnar kl. 19:00 þar sem áhugasamir geta skoðað Canon ljósmyndabúnað.

Frítt inn og allir velkomnir, en nauðsynlegt er að skrá sig á vef Nýherja.

Skráðu þig á Fuglar og ljósmyndun með Canon

Viðburðurinn á Facebook: Canon kynning og myndakvöld 30. mars

Fuglaskoðun í Flóa á sunnudag

Sunnudaginn 26. júní 2016 mun Fuglavernd bjóða upp á fuglaskoðun númer þrjú í fuglafriðlandinu í Flóa. Fuglaskoðunin hefst klukkan 17:00 við fuglaskoðunarskýlið sem er við bílastæðið í Friðlandinu.

Votlendisfuglar einkenna svæðið og eru bein tengsl við nálæg fuglarík svæði eins og fjöruna, Ölfusárós og Ölfusforir. Fuglalífið er sérstaklega auðugt og tegundaríkt á varptíma en nærri 25 tegundir verpa þar að staðaldri.

Á heimasíðunni okkar má finna frekari upplýsingar um Fuglafriðlandið um gróður og dýralíf með meiru.
Mikilvægt er að vera í stígvélum eða nær vatnsheldum skól því það er frekar blautt á. Muna eftir sjónaukanum og gaman er að taka með handbók um fugla.
Allir velkomnir en hér má sjá kort af Friðlandinu í Flóa.

Ljósmyndanámskeið 6., 7. og 8.maí

Námskeið í stafrænni fuglaljósmyndun verður haldið dagana 6., 7. og 8. maí 2016. Markmið námskeiðsins er að kynna grunnatriði í fuglaljósmyndun, tæki, tækni og nálgun við fugla. Farið verður yfir hvaða myndavélar henta best, hvernig linsur, þrífætur, forrit og fl. tæknileg atriði. Rætt verður um myndbyggingu, felutjöld, ljósmyndun úr bíl og annan útbúnað. Hvað er öðruvísi við að mynda fugla, hvað ber að varast og hvað gerir það eftirsóknarvert. Námskeiðið getur nýst jafnt byrjendum sem lengra komnum sem hafa áhuga á fuglaljósmyndun.

Námskeiðið verðu þrískipt – þrjú skipti.

Föstudagur 6. maí frá 18:30-22:00 – innifalinn er léttur kvöldverður
Í fyrsta hluta er farið yfir grunnatriðin. Farið verður yfir hvað skiptir máli við val á myndavélum, linsum og aukabúnaði. Stillingar og tæknileg atriði verða rædd. Farið verður í hluti eins og myndbyggingu og hvað þarf að hafa í huga þegar verið er að mynda. Bent verður á góða staði til fuglaljósmyndunar, skoðað hvernig best er að nálgast fugla og farið verður í ýmis hagnýt atriði er snúa að fuglaljósmyndun.
Leiðbeinandi er Sindri Skúlason.

Laugardagur 7. maí 13:00-17:00 – sameinast í bíla
Í öðrum hluta er farið í vettvangsferð þar sem þátttakendur spreyta sig í fuglaljósmyndun. Farið verður á nokkra góða fuglaljósmyndastaði sem eru eftirsóttir á höfðuborgarsvæðinu. Sýnt hvernig þekking á íslensku fánunni nýtist í að nálgast viðfangsefnið.
Leiðbeinandi er Daníel Bergmann.

Sunnudagur 8. maí 18:30-22:00 – innifalinn er léttur kvöldverður
Þriðji hluti er svo helgaður úrvinnslunni og frekari leiðum til að öðlast færni í bæði fuglaljósmyndun og eftirvinnslu. Farið yfir helstu atriði við lagfæringu mynda og hvaða forrit er best að nota.
Leiðbeinandi er Christopher Lund.

Verð 35 þús. fyrir félagsmenn en 39. þús fyrir utanfélagsmenn en bent er á að mörg stéttarfélög taka þátt í kostnaði við námskeið af þessu tagi, allt að 50% af námskeiðsgjaldi. Skráning er hafin en vinsamlegast sendið nafn, kt. og heimilisfang á netfangið fuglavernd@fuglavernd.is. Fyrstir koma fyrsti fá – en við tökum ekki fleiri en 17 á námskeiðið.