Myndasýningarkvöld Canon og Fuglaverndar 4. maí í Origo

Daníel Bergmenn og finnskur verðlaunaljósmyndari

Canon og Origo, í samstarfi við Fuglavernd, efna til viðburðar fimmutdaginn 4. maí nk. þar sem tvær kanónur á sviði fuglaljósmyndunnar muna sýna sínar ljósmyndir og segja sögurnar á bak við þær.

Annars vegar Daníel Bergmann sem mun fjalla um ólíka stíla í fuglaljósmyndun og hvernig hans sýn hefur þróast í gegnum áratugi.

Daníel hefur til fjölda ára verið einn af fremstu fuglaljósmyndurum Íslands og þótt víðar væri leitað. Hann hefur skrifað fjórar bækur og myndir hans hafa verið birtar í bókum og tímaritum.

Daníel hefur verið með vinnustofur í ljósmyndun og ljósmyndaferðir á Íslandi, Grænlandi og Svalbarða og býr yfir gríðarlegri reynslu sem leiðsögumaður.

Hins vegar Markus Varesvuo frá Finnlandi sem er margverðlaunaður náttúrulífsljósmyndari sem hefur sérhæft sig í fuglaljósmyndun. Hann er einn af þekktustu náttúrulífs- og fuglaljósmyndurum Finnlands og er einn af þeim fremstu í heiminum.

Markus hefur unnið til næstum 100 verðlauna í náttúrulífs-ljósmyndakeppnum, þar á meðal í Wildlife Photographer of the Year, World Press Photo sem og Portfolio Award í Bird Photographer.

Markus hefur gefið út 15 bækur um fugla á átta tungumálum. Sumar bækurnar hefur hann skrifað sjálfur og aðrar í samstarfi við fræðifólk eða aðra ljósmyndara. Hann hefur selt um 150.000 eintök af bókum.

Viðburðurinn fer fram í Origo, Borgartúni 37 og húsið opnar kl. 19:00 þar sem áhugasamir geta skoðað Canon EOS R ljósmyndabúnað en myndasýningar hefjast kl. 19.30.

Ókeypis aðgangur en nauðsynlegt að skrá sig.

Fálkar. Lsjm Daníel Bergmann