Með haukfránum augum & upplestur

Miðvikudagskvöldið 6. desember verður upplestur og erindi í máli og myndum um ránfugla á Íslandi.

Upplestur úr Fuglum

Hjörleifur Hjartarson, annar höfundur bókarinnar Fuglar sem kemur út hjá Angústúru nú fyrir jólin ætlar að koma og lesa valda kafla upp úr bókinni. Í lýsingu bókarinnar segir:

„Varúð! Þetta er ekki góð fuglagreiningarbók. Fuglarnir í henni eru illa teiknaðir og textinn fullur af fordómum og tilgerð. Vert er að hafa það í huga við lesturinn. Hafir þú hins vegar áhuga á krassandi sögum af áhættusækni, skrautfíkn og ástarlífi íslenskra fugla, og hvers kyns sérvisku sem tengist þeim, þá er þetta rétta bókin fyrir þig.

Falleg bók um íslenska fugla fyrir alla fjölskylduna. Spéfuglarnir Hjörleifur Hjartarson og Rán Flygenring draga fram helstu sérkenni fuglanna í máli og myndum án þess að taka sig of alvarlega og niðurstað er einstök og óvenjuleg en um leið fræðandi bók um íslenska fugla.”

Bókin Fuglar er fáanleg í vefverslun okkar.

Með haukfránum augum

Sindri Skúlason fuglaljósmyndari leiðir okkur inn í heim íslensku ránfuglanna í máli og myndum. Farið verður yfir þær tegundir sem hér verpa og okkur gefin innsýn í daglegt líf þeirra. Þetta eru harðgerðir fuglar sem þreyja lífsbaráttuna hér á norðurhjara veraldar við oft á tíðum erfiðar aðstæður og ekki er annað hægt en að dáðst að þrautsegju þeirra og dug.

Aðgangseyrir

Frítt inn fyrir félagsmenn Fuglaverndar, hér má gerast félagi í Fuglavernd.  Aðgangseyrir fyrir aðra en félaga 500 kr.