Garðfuglahelgin 2020

Síðasta helgin í janúar er garðfuglahelgin hjá Fuglavernd. Garðfuglahelgin á sér fyrirmynd hjá RSPB, konunglega breska fuglaverndarfélaginu sem er systurfélag og samstarfsaðili Fuglaverndar.

Veldu stund (og stað)

Þó viðburðurinn kallist garðfuglahelgin, þá velur þú stund og stað fyrir þína athugun. Best er að velja stað (garð) þar sem fuglum er gefið fóður yfir vetrartímann. Þú velur stund, athugunin á að fara fram á einni klukkustund og þú velur hvaða dag þér hentar frá föstudegi til mánudags, það getur verið háð veðri, birtu, skyggni og þínum frítíma.

Á athugunartímanum, þessum eina klukkutíma sem þú velur, fylgist þú með fuglunum í garðinum. Í niðurstöðurnar skráir þú hæsta fjölda fugla sem var í garðinum í einu. Það á aðeins að telja þá fugla sem eru að nota garðinn (sér til matar, hvíldar, snytingar eða svefns) ekki á að telja þá fugla sem fljúga yfir.

Það á ekki að leggja saman, þ.e. ekki telja þá fugla sem koma fyrstu 15 mínútur klukkutímans og svo aftur næstu fimmtán mínútur og svo koll af kolli, heldur á að fylgjast með staðnum (garðinum) í eina klukkustund og skrá hæsta gildi, flesta fugla sem eru í garðinum í einu. Þannig er komið í veg fyrir tvítalningar.

Skráning niðurstaðna

Best er að skrá niðurstöður athugunarinnar rafrænt, smelltu á formið hér fyrir neðan og sláðu inn þínar upplýsingar.

Garðfuglahelgin 2020, rafræn skráning athugana

Einnig má prenta út skráningarblöð garðfuglahelgarinnar og senda til okkar að athugun lokinni.